Ua toe aafia foi kamupani tetele e lua o le Woolworths ma Coles i Ausetalia nei i se isi foi su fai faatasi poo se class action ua faia faasaga ia i latou i le faamasinoga ona o tuua’iga e faapea ua faia e supamaketi ia e lua ni polomisi taufaasese o le a o latou ofoina ni tau aupito lelei mo le au faatau.

O le ofisa loia o Gerard Malouf and partners na failaina le tagi lea i le aso ananafi ma ua faailoa i lipoti a le nightly.com e fuafua e le ofisa loia o le totogi e ono maua e se tagata faatau e to’atasi pe a manuia le finau lea e i le va o le 200-silia ma le $1,300.

Fai mai o lea gaioiga o loo taula’i sa’o lava i le toe maua ane o le eseesega i le tau na faapa’ū discounted price ma le tau sa’o o le oloa mo le faitau selau o oloa na faatau ane mai ia Coles i le va o Fepuari 2022 ma Me 2023 aemaise ia Woolies i le va o Setema 2021 ma Me 2023.

Fai mai le ofisa loia o le faia o lea gaioiga o se mea e tatau ona fai ia malupuipuia ai aiatatau a tagata faatau ma ia finauina le faia ma le amiotonu o tau o oloa i faleoloa o Ausetalia.

E lē o fia faia se faamatalaga a le Woolworths i lea mataupu ae o Coles ua o latou tusilima i se pepa o faamatalaga mai le masina o Setema e faatatau i le gaioiga na faatino e le ACCC – Australian Competition and Consumer Commission.

Puna o Faamatalaga: https://thenightly.com.au/business/fresh-legal-action-launched-against-coles-woolworths-over-claims-of-misleading-discounting-c-16749650#:~:text=%E2%80%9CThis%20action%20focuses%20solely%20on,May%202023%2C%E2%80%9D%20it%20said.