Ua aloaia nei ona faaulu i le faamasinoga a le atunuu le talosaga a le ta’ita’i o le Itu agai ma le faipule o le itumalo palota o Lepa, faapea le sui faipule o Faleata 3, ua lu’i ai le faai’uga a le Komiti o tulaga mamalu ma aloaia a le Palemene faasino i le fautuaga a le komiti e faamālōlō lē tumau tiute faafaipule o le susuga Tuilaepa L Sailele Malielegaoi ma le tofa Lealailepule Rimoni Aiafi.
E lei manuia se taumafaiga i le fia maua o se kopi o le talosaga e iloa ai mau o loo autu iai le finauga a le itu talosaga, ae o loo tālia nei se aso o le a faatulaga e fofogaina ai mo le valaauga muamua i le faamasinoga sili.
O loo faamālōlō lē tumau ia sui faipule o le Palemene seia iai se aso, ma e mafua ina ua faamaonia ua o la soli tulaga mamalu ma aloaia o le Palemene i ni saunoaga na o la faia faasaga i le faamasinoga a le atunuu.
