Ua iai le popolega o se tasi o social worker i le sese ona faauigaina o upu mai le Tusi Paia e nisi o tamā Pasefika ina ia ufiufi ai sauaga i totonu o aiga.
I se lipoti a le leitio a Niu Sila o loo toe molimau ai Genevive Sang-Yum, o se faiaoga i le Unitec i Waitakere ma o ia foi o se social worker e iai lona pito Samoa toe Saina, ua ia maitauina le faaopoopo o tamā Pasefika ua agai atu i le polokalame o loo ia faatautaia e faatatau i auala e fesoasoani ai i tamā Maoli ma Pasefika e faamuta sauaga i totonu o aiga.
Na ta’ua ai e le faiaoga o le toatele o tamā Pasefika faatoa faimalaga mai e nonofo tumau i Niu Sila nei, e lei malamalama i amioga e lē talafeagai.
O upu o le Tusi Paia o loo ta’ua ai le gauai o avā ia latou tane o se tasi lea o fuaiupu ua molimau Sang-Yum o loo ave sese e le toatele, ae o isi tamā e fai mai o la latou lava aiātatau le faaoolima i le tina.
O sauaga nei i totonu o aiga o loo matuai ta’uleagaina ai le igoa o Niu Sila i totonu o le li’o o atunuu ua mausali atinae i le OECD lea o loo iai i totonu atunuu e 38.
Puna o Faamatalaga: Social worker says Pacific men misinterpreting the Bible to justify domestic violence | RNZ News
