E 23 tausaga le matua o se tamaitai sa galue i le Pulega o Malaevaalele ua falepuipui i moliaga o le gaoi a o avea ma tagata faigaluega i le malaevaalele i Faleolo.

I faamaumauga a le faamasinoga o le matafaioi a lea tamaitai o le aoina lea o tupe o lafoga mai tagata e malaga atu i Amerika Samoa.

I lipoti e faapea o gaioiga a lea tamaitai e iai nisi o risiti e lē faamauina i lalo ae o loo masalomia e tatia’i e lea tamaitai ae ia tuua le tupe.

Ina ua maua lea tamaitai, e lata i le $10 afe tala le tupe na aveese faasolitulafono e lea tamaitai.

E lei ‘alo saunoaga a le afioga i le faamasino o Leiataualesa Daryl Clark i le tele o mataupu faapea e oo atu i le faamasinoga.

Saunoa Clarke ua pepesi faafaamai lea soligatulafono i le atunuu, ma toeitiiti lava leai se pisinisi e sao mai ai.

Ta’ua e Clarke, e tatau i le faamasinoga ona faaauau le faia o faasalaga mamafa i mataupu faapenei e ta’u atu ai i tagata e lē māmā i le vaai a le faamasinoga ia soligatulafono.

O itu ogaoga o le faalēaogāina lea e lea tamaitai o le faatuatuaga a le Pulega o Malaevaalele na tuu atu ia te ia e galue ai.

O le faasalaga e 10 masina ua falepuipui ai lea tamaitai i le toese.