O le faletua ia Lona Faalafi o loo faauluulu iai le aoaoina o siva a le fanau i le polokalame ua faaiogina o le Elei ma le Mamanu.
O le polokalame na amata mai i le tausaga 2018, i le na o le kulupu a tamaitai e 50 tamaiti.
Ae peitai ua lē uma le fia auai ma alii, o lea ua faaofi atu ai loa ma alii lea ua faaigoina ai loa le latou ausiva o le Mamanu.
E toaitiiti fanau sa amata mai ai, ae i le taimi nei ua oo atu le toatele o fanau i le 200 e aofia ai alii ma tamaitai.
O le 5 tausaga e oo atu i le 18 tausaga le matutua o fanau o loo auai.
O le faamoemoe maualuga o lenei taumafaiga o le taumafai lea ia aoaoina fanau laiti tamaitai ma tama talavou i le siva Samoa, ae ina ua folau lelei le faatautaiga o le polokalame ua tele ai loa ma le avanoa e aoaoina ai ma le gagana Samoa mo fanau.
O le tele o fanau i totonu o le Elei ma le Mamanu, o fanau laiti na fananau ma soifua i totonu o Niu Sila nei.
E lua vaega o loo vaevaeina ai tamaiti, o fanau i le itu i Sisifo o Aukilani ma tamaitai i le itu i Saute.
E fā kuata o loo fai ai aoaoga i le tausaga, ae o loo tatala le avanoa mo soo se tamaititi lava e fia auai e aofia ai ma tamaiti o isi atunuu lea ua ofi atu ai i totonu.
O le amataga o le polokalame sa tau faafaigata i le faletua ia Lona Faalafi ona aoao le toatele o tamaiti, ae ua oo mai i le taimi nei ua faafaigofie le galuega a le faletua ia Lona Faalafi ina ua iai nisi o fanau ua mafai ona fesoasoani i lana galuega, a o tamaiti lava sa latou amataina siva i le Elei ma le Mamanu.
