Ua faatumau le faaiuga a le faamasinoga maualuga a le atunuu i le mataupu i le vaevaeina o le faamanuiaga poo le uili, a lē sa avea ma Faamasino Sili o le atunuu ua tuumalo, ma ua teena ma lē talia ai e le faamasinoga o talosaga apili, le talosaga a le faletua o Iliganoa Daphne Sapolu, e ala i lana loia ina ia toe iloilo lea faaiuga.
I le fofogaina o faaiuga a lea faamasinoga i le Aso Lua o le vaiaso nei, ua faailoa ai o finauga a le itu talosaga sa fesiligia ai le tulaga talitonuina o le saini a lē e ana le uili i pepa, ma le aafiaga o le tuafafine o le afioga Patu Falefatu Sapolu i le tapenaina o le uili, ua teena.
Ua faatonuina ai lē na talosaga e toe iloilo le faaiuga, e totogi atu le tai limaafe tala i itu auai sa faasaga iai le apili.
O le tasi o mataupu tau apili ua lē talia ma faaleaogaina ae faatumau pea le faaiuga a le faamasinoga sili na faamaonia ai moliaga, o le talosaga a Daryl Mapu e ala i lana loia, sa toe finauina ai le faaiuga na faamaonia ai moliaga e 6 o le umia o le aisa le methamphetamine, umia o paipa, umia o laau malosi ma le umia o ututau.
Ua faaalia i le faaiuga a le faamasinoga o talosaga apili, o le taunuuga o suesuega o molimau o lea mataupu o loo sagatonu ma talafeagai lelei ma mau a leoleo na tuuina atu e lagolago ai moliaga uma.
E 18 masina o loo nofosala ai i le falepuipui Daryl Mapu sa avea ma se tasi o ofisa sinia i le ofisa o le komisi o faigapalota.
O se tamaitai o lea ofisa o le Malo sa molia faatasi i laua na soloia ma faaleaogaina ona moliaga, ina ua lē faamaonia.
