O le a faia faasalaga i avetaxi e maua ua tape mita o a latou taavale pe soli foi le tulafono ma e ono oo atu i le afe tala le faasalaga e pei ona ta’ua i le lipoti a le Sunrise i le asō.
Fai mai le sui o le asosi o le auavetaxi o le fuafuaga lenei o se taumafaiga mo le faaleleia atili o le auaunaga ma e ao foi ona faatino ma usitaia tulaga uma ua faatulaga.
O tulaga e aofia ai le tatau pea ona faaola le mita o le taavale e tusa pe vavalalata nofoaga e malaga ai le pasese e tatau lava ona totogi e fua i le mita ae lē o le pule ai o le avetaxi i lana totogi.
O le isi itu o le lē mafai lea ona ia teena se talosaga mo se malaga e vavalalata, i lalo o le tulafono e ao lava ona faataunuu le auaunaga e pei ona faatulafonoina ai le feoai a taavale laiti la’upasese poo taxis.
Fai mai le matagaluega o loo feagai ma le auaunaga lea o se tasi lenei o taumafaiga e aveesea ai foi i latou o loo faaleagaina le auaunaga e ala i le lē usitai pea i tulafono ua faatulaga ma ua mafai nei foi ona valaau i se numera pasese ia faailoa iai ni faaseā e ono alia’e pe afai e le usitaia e avetaxi ia tulafono.
