Ua faatonuina e le minisita o le puipuiga a Ausetalia le aveesea o meapueata a Saina, surveillance cameras mai nofoaga o ofisa o le malo o Ausetalia, o se vaega sa maitauina mai se iloiloga na faia.
O le asō ua folasia ai e le minisita lea faamatalaga i le mae’a o le suesuega sa faatino ua iloa ai toeititi afe meapueata a Saina o loo faapipii solo i nofoaga ia a le malo.
O meapueata faatekonolosi sa fausia e le Hikvision and Dahua lea e iai sootaga ma le malo o Saina.
Fai mai le minisita o se mataupu tāua ua o latou iloa nei ma e foliga ua fai si leva ona iai ae lei agai atu le faigamalo fou.
O isi atunuu e aofia ai Amerika ma Peretania ua o latou faatino foi le gaioiga lea o le aveesea mai o meapueata ia mai ofisa o le malo ona o popolega i ni polokalame e ono faaaoga faasipai.
Ua faailoa e le 9News o meapueata ma isi meafaigaluega tau le puipuiga na maua i matagaluega uma sei vagana le matagaluega a le Palemia ma le Kapeneta ma le matagaluega o Faatoaga.
O loo faitioina e le Palemia sa iai muamua o Ausetalia o Paul Keating ma Malcolm Turnbull le AUKUS fai mai ua faailoa atu ai le faalagolago tele o Ausetalia ia Amerika.
Peitai o le tali a le minisita o le puipuiga Richard Marles ua ia ta’ua ai o le maliega i lalo o le AUKUS lea o le a maua ai e le navy a Ausetalia vaamaulu niukilia, o le a fesoasoani lea i le fausia o agavaa ma avanoa mo Ausetalia.
E le gata i lea o le a atili lelei ai le tali atu a Ausetalia i faamatalaga mai le faaitu lea o Asia ma le Pasefika e ala i le fesoasoani mai faiga tau tekonolosi mai Amerika ma Peretania.
O loo iai le fuafuaga e asiasi le Palemia o Ausetalia Albanese i Uosigitone mo se feiloaiga ma tusitala e fai faatasi ma le Peresetene o Amerika ma le Palemia o Peretania e pei ona lipotia e le Nine Newspapers.
