Ua faatonuina e le faamasinoga o talosaga apili a le faamasinoga maualuga le ave o faamanuiaga tau totogi mo lē sa avea ma Peresetene o Faamasinoga o Fanua ma Suafa, le afioga Fepuleai Attila Ropati.
E iva masina o ia faamanuiaga e tatau ona tuuina atu mo ia, e afua mai ina ua faamuta lona toe avea ma Peresetene ia Oketopa o le tausaga na tea nei, ina ua filifilia le Peresetene fou ua iai nei o lea faamasinoga tāua a le atunuu.
Sa ave le talosaga apili a Fepuleai faasaga i le faaiuga a le faamasinoga maualuga na lē talia ai lana talosaga mo le faia o se poloaiga e faaauau ai lona tofiga pelesetene e tusa o aiaiga o le faavae ma le tulafono fou o faamasinoga o fanua ma suafa na pasia e le palemene i le tausaga e 2020.
Ua talia lana talosaga apili mo le suesueina o lea talosaga i se tulaga aoao tetele poo se substantive hearing, ma aumai ai ma le faaiuga a lea faamasinoga i le agavaa o lē e ana le talosaga apili i faamanuiaga tau totogi mo le umi e iva masina.
Ua faailoa e le faamasinoga o talosaga apili i se vaega o lana faaiuga i le mataupu lenei, o gasu ma lavelave i le tapenaina o tulafono na teuteu ai le faavae ma fausia ai le tulafono fou o faamasinoga o fanua ma suafa, ua mafua ai ona toe fesiligia i finauga faaletulafono le anofale o lea tapenaga atoa, ma o le tatalo a lea faamasinoga ia talosia e taunuu manuia i se ta’otoga lelei.
