Ua faatonuina e le Faamasinoga o talosaga apili le tatala i tua i ni aiaiga o ni alii talavou se toalua, sa tuli o la faasalaga tai valu masina i le solitulafono o le lima tagoese a o avea ma tagata faigaluega a le Samoa Sports Lotto, ae faatali le faaiuga o le la talosaga apili ua lui ai e le la loia le faasalaga faafalepuipui.
O le Aso Gafua na faia ai lea faaiuga a o suesueina le apili o loo fesiligia ai le faaiuga a le Faamasino Sili na faasala ai i le falepuipui ia taulelea talavou, ae sa suia le la tali tetee i le ioe ma ua mae’a foi ona toe totogi seleni a le Sports Lotto na aafia i le la solitulafono.
Sa ave le talosaga a le loia a ia taulelea i ni vaiaso e lei mamao atu sa finau ai e tatala mai i tua ma le falepuipui i laua ua faasalaia e faatali ai se iuga o le la talosaga, peitai sa le talia.
Ae o le mataupu lenei ina ua oo i le faamasinoga i le tausaga e 2021, o isi o le aufaigaluega a lea auaunaga tau taaloga faitupe o le Sports Lotto sa ioe io latou moliaga ma sa toe totogi tupe na latou faaaoga, ae sa le faasalaina i le falepuipui ae nofo vaavaaia.
O taulelea e toalua ua tatala i tua ua mae’a ona tuli le lima o masina o le la faasalaga valu masina, ma ua faatali nei i se faaiuga o le la talosaga apili, o le a fofogaina i le Aso Gafua asau.
