Ua ta’utino le ofisa sooupu a le malo o loo latou faailoa lautele matāupu eseese a le malo, o le sesē o le faatinoga o lana auaunaga na māfua ai ona faaluafesasi ma sesē le faailoaina o le filifiliga a le Kapeneta o le tofiga Ofisa Sili fou o le matāgaluega o le soifua mālōlōina.
O lea sesē na muamua ai faailoa le tofia o le alii foma’i le afioga Toleafoa Dr Viali Lameko, o le Ofisa Sili filifilia lea mo le matāgaluega, peita’i o le silia i le ‘afa itula talu ona mae’a lea faasalalauga i le upega tafa’ilagi a le malo, ae sau le isi faasalalauga ua faailoa ai o se tasi o tama’ita’i tausi soifua sinia, o le faletua ia June Scanlan Lui o le Ofisa Sili lea ua filifilia e avea ma faauluuluga poo le Faatonu Sili lea o le Matāgaluega o le Soifua Mālōlōina.
Ua faatoese ai le ofisa sooupu le press secretariat a le malo o loo aofia i le pulega a le Matāgaluega a le Palemia ma le Kapeneta i le alii foma’i le afioga Toleafoa Dr Viali Lameko ma le tama’ita’i Ofisa Sili fou ona o le sesē o le faasalalauga na faia muamua.
O le faletua o June Scanlan Lui ua 40 tausaga o galue i le soifua mālōlōina o se tausi soifua faauuina, ma e tofia nei o loo avea o se tasi o Ofisa Sili Lagolago o lea matāgaluega o loo faauluulu iai le auaunaga faatausi soifua.
Ua sui tulaga o ia i le alii foma’i sa avea ma Ofisa Sili na faamavae ina ua tauva i le palota tele le afioga Aiono Dr Alec Ekeroma le sui Faipule o Aana Alofi 2 o loo tauaveina le tofi minisita o le kapeneta mo le matāgaluega o A’oga ma Aganuu.
