Ua faatoese le ausoka a tamaitai mai Spain i le foliga mai sa o latou faailoa ni uiga fia mālie ma ula ane e faatatau i le haka i le taimi na faafeiloai ai aloaia i latou ina ua taunuu mai i Aotearoa mo le ipu o le lalolagi i lea taaloga.
Fai mai le Newshub o le amataga o le masina nei na taunuu ai teine taalo e toafā mai le ‘au lea i Aotearoa ma sa pueina sa latou session sa faia i toleniga ma maua lelei ai le taliē ma foliga o loo fai ulaga i le haka, ka mate.
Ua tapē ese le video lea mai alaata aloaia a le ‘au a Spain ae o loo iai nisi o faafesili tau faasalalau i le mataupu lea e le o tali ane iai le ‘au a Spain.
O loo tulaga ono nei lea ‘au i le lalolagi i le taaloga soka ma o loo faamautu i Palmerston North mo le Ipu o le lalolagi ma e iai a latou taaloga e faia i Ueligitone ma Aukilani.
Ina ua faia se isi sauniga faafeiloai mo le faamoemoe o taaloga, sa faatoese ane ai le kapeteni o le ‘au i le tulaga lea ma i le faailoaina o le agaga salamō mai le tulaga e pei ona lipotia ua o latou foaiina ane ai se jersey o le latou ‘au i Tangata Whenua.
O le aso 26 o le masina nei lana taaloga muamua ma le ‘au a Costa Rica e faia i Ueligitone.
