O le alii talavou 19 tausaga o Joseph Suaalii, o se tasi o sui iloga o le Toa Samoa i le taamilosaga o le Ipu a le lalolagi na faatoa mae’a atu mo le lakapi liki, ua lipotia mai le faatau o lona fale motu (2 bedroom apartment) mo le $1.5 miliona i se tasi o vaipanoa e taugata ai fale i Double Bay i Niu Sa Uelese.
O Joseph Suaalii, o le alii pito laititi lea o le ‘au a le Toa Samoa ma sa matuā mata’ina le faatinoga o lana taalo a o faagasolo ai le taamilosaga o le Ipu a le lalolagi o le Lakapi Liki na faatoa mae’a atu.
O se apartment e lua potumoe ma o le ituaiga o fausaga mai le 1960s ma o se fale sa $440,000 le tau na iai i le 2009, na toe faatau atu i le $810,000 ia Fepuari 2019 e le Ray White Double Bay agent o Daniel Ungar, ae o lea la ua faatau e Suaalii i le $1.5 miliona.
E ese mai lona sao na taalo ai mo le ‘au a lona atunuu o Samoa i le itu a lona tamā, o Joseph Suaalii e taalo mo le ‘au a le Roosters i taamilosaga a le NRL. O loo faatalitali pea i latou e taumulimuli i taaloga a lei alii talavou, e fia iloa poo fea le atunuu o le a siilima Suaalii e taalo ai mo le isi Ipu a le lalolagi o le lakapi liki i le 2025.
