E lē o toe mamao ona amatalia lea o se galuega tele mo le toe faia atoa o le malaetaalo o le Apia Park i Samoa, ae ua faamaonia le avea ai o le aai o Rotorua ma nofoaga mo le faatautaia ai taaloga faitaulia a le ‘au a le atunuu, le Manu Samoa.
O lenei taaloga o le a iloilo ai ma le ‘au a Fiti, i le masina o Setema i le tausaga nei, ma e faamauina o lenei taaloga o se taaloga tāua mo ‘au e lua, a o tapenapena atu ai mo le taamilosaga a le Northern Hemisphere i se taimi o lenei tausaga, aemaise tapenapenaga uma mo le Lakapi a le Ipu o le Lalolagi i le tausaga 2027.
Ta’ua e le Pule Sili o le Lakapi Samoa, Seumanu Douglas Ngau Chun i se pepa o faamatalaga, o lagona fiafia ma le faagaeetia, le mafai ai ona aumai se isi taaloga “home test match” a le Manu Samoa e faatino i Niu Sila, aemaise o le a faatino i Rotorua, o se aai e ola ai le taaloga lakapi.
I le talaaga o le faatino ai o taaloga faavaomalo i le malae taalo i Rotorua, e ta’ua, ua tele taaloga ua faia i Rotorua e pei ona iai le taaloga a ‘au mai Petetania ma Aielani, ma nisi o taaloga a le Māori All Blacks, ae o le a faapena ona faaopoopo atu le ‘au a le Manu Samoa i le lisi o ‘au mai faavaomalo o le a taaalo i le malae i Rotorua.
Puna o Faamatalaga: https://www.rnz.co.nz/news/sport/559579/manu-samoa-to-have-home-rugby-test-against-fiji-in-rotorua
