O le polokalame fesoasoani a le pulega o le Lakapi Samoa mo le faaauauina pea o le atina’eina o le taaloga i totonu o nuu ma afio’aga e ala atu i iuni faaitumalo, ua molimauina ai i auala o faafesoota’iga a le pulega o le lakapi i Samoa le tauaao atu o seleni e lagolago ai taumafaiga a iuni lakapi faaitumalo.
O le faai’uga o le vaiaso a o faagasolo taaloga o le taamilosaga o lenei tausaga sa tauaao ai e le Pelesetene ma le ta’ita’ifono faavaitaimi o le lakapi Samoa le siaki tupe e 4 afe lima selau tālā i le pulega o le iuni faaitumalo a Siumu, ina ua mae’a ona tauaao foi lea lava lagolago tau tupe i isi iuni faaitumalo i le motu o Upolu.
O loo faailoa foi i fesoota’iga a le pulega o le taaloga lakapi le tuuina atu o se fesoasoani tupe e tusa ma le 40 afe tālā i le iuni lakapi a tama’ita’i Samoa.
O se seleni o le a una’ia ai le atina’eina o le itupa o tama’ita’i i le siitia o le taaloga lakapi.
