O le faaaloalo maualuga faalemalo o le tulai faaaloalo a leoleo, ua faatino e le Malo o Samoa ma lana taligamalo i le Kovana Sili o Amerika Samoa ma lana usugafono i talanoaga a taitai o Malo e lua lea ua faaigoa o le Atoa o Samoa.
Ua faailoa e le ofisa sooupu o le Malo o Samoa lea faaaloalo maualuga e tomua ai le tatalaina o le fonotaga, i le sauniga i luma maota o le Malo i lenei Aso Tofi i Samoa Tutoatasi.
O saunoaga a taitai o Malo e lua le Kovana Sili ma le tamaitai Palemia, ma le sauniga lotu o nisi ia o vaega tāua o le tatalaina o le fonotaga, ae taualuga i faaaloaloga faaleaganuu.
O le Aso Lulu na asiasi ai le Kovana Sili ma lana usugafono i nisi o tautua a le Malo o Samoa e pei o le Iunivesite Aoao i le Papaigalagala, ma le Maota gasegase i Motootua i le nofoaga o loo faafailele ai aoaoga faafomai.
Sa asia foi e le usugafono mai Amerika Samoa nisi o galuega tetele o loo feagai ma le Pulega o Felauaiga i luga o le laueleele e pei o le fausia o ala tetele.
O le fonotaga i le va o taitai o Malo e lua o le a amata i le toe asiasi i nisi o mataupu tau i le atinae o le tamaoaiga, le soifua maloloina, puipuiga o le siosiomaga ma femalagaiga aemaise le puipuiga lautele, a o lei taualuga i le faaiuga o le vaiaso i talanoaga faavaomalo i mataupu lautetele e tatau ona galulue faatasi ai.
