E silia ma le 20 sui o loo auai i se aoaoga o loo faafoeina e le vaega mai le asosi a le taaloga soka faavaomalo poo le International Federation of Association Football (F.I.F.A.).

O lenei aoaoga na saunoa ai se tasi o laufalī lagolago a le F.I.F.A. i Samoa nei Maria Akenese Salamasina le tāua mo sui auai.

“Ua ogatasi lenei faamoemoe ma le taamilosaga o loo faatautaia i le taimi nei mo i latou o loo auai aemaise ai o sui ia o le a auai atu i taaloga o le Pasefika e faailoa ai tulafono.

“O le isi tulaga ua aoga le malaga mai o le F.I.F.A. instructor e faalauiloa nisi o tulafono fou a faatino taaloga e oatu laufalī e faafoe le taaloga ma faailoa atu i kalapu nisi o vaega mai lenei aoaoga.”

E 17 tulafono a le taaloga o le soka ma o nisi o nei tulafono e pei ona ta’ua e Salamasina, “E mai le 17 o tulafono nei e iai lava tulafono e masani ona iai tulaga e aliae mai ma o le aogā lena o lenei aoaoga e faamanatu ina ia malamalama auā e iai lava i latou e le o silafia nei vaega.”

O se tasi o faafitauli tele o loo feagai i lenei itu o le galuega faalaufalī o le tulaga o le fitness e pei ona ta’ua.

“Ou te iloa o lenei tulaga e pa’ū lava i le tagata ia o loo naunau i lenei tofiga.

“O loo faatino toleniga mo le fitness i laufalī o le soka lea o loo faia i vaiaso uma, e leai se mea e le mafaia ona faia a tago lava le tagata ia e naunau ia taunuu se tulaga lelei ia o le vaega na e ao ona fai.

“O loo iai nisi ua pasi le test sa faatino mo lea vaega ae o le mamafa lava o le itupa o tamaitai o le ala lena o loo unaia ai lava tamaitai o loo auai i lenei aoaoga ina ia mafai ona siitia lea laasaga.”

O loo faagasolo lenei aoaoga i le vaiaso atoa e tapenapena ai i latou mo nisi foi vaega o le galuega faalaufalī aemaise lona atinaega i le faafoeina o taaloga soka i le atunuu.