Ta’utino le alii faia’ogaulu o le Manu Samoa taitoafitu, le afioga Muliagatele Brian Limā, e toe tasi le aso malaga le ‘au mo a latou tapenaga i le Olimipeka ae taunuu atu ia te ia le tusi mai le CEO poo le Ofisa Sili o le Lakapi Samoa, e faailoa atu ai ua faamutaina a latou konekarate pe a foi mai le Olimipeka.
Ina ua faatalanoa Muliaga i luga o le ET Live, na ia ta’ua ai, o le iloiloga ma le suesuega na faia i le aso 10 o Iuni, ina ua foi mai le ‘au mai le taamilosaga i Sepania ma le tulaga faaletonu, na faia le faai’uga a le Komiti Faafoe o le a faamālōlō tama e toafā ia na faia le faufauga e faaleaga taaloga a le ‘au, ae ia toe saga’i ane le faia’oga ma le pulega e tapena le ‘au mo le Olimipeka, seia foi mai taaloga o le Olimipeka ona toe faia lea o se iloiloga.
O le faai’uga lena na tuu fofoga ane e le ta’ita’ifono o le Lakapi Samoa i le aso 12 o Iuni, ma o le faai’uga foi lena o lea sa nonofo ma latou a o tapena mo le Olimipeka, peitai e pei ona saunoa Muliaga, na toe faafuase’i ona oo atu le tusi lea ua faailoa atu ai le faamutaina o a latou konekarate ae o le tusi atu mai le Ofisa Sili e logo atu ai le faai’uga e tusa ai ma le suesuega ma le iloiloga na faia i le aso 10.
Na fesiligia e Palauli le susuga i le faia’oga i ni ona lagona i lena taimi, pe sa manao pea e ave le ‘au mea ane o lea ua faamuta lana konekarate, ae na tali Muliaga, e sili ona pele ma faatāua ia te ia le tapuaiga a Samoa mo lana ‘au, ma e ui i se tiga o lona loto i le mea ua fai ia latou, ae na ia mafaufau, afai nei o le a faamaamulu e lē alu, o le a fesiligia e tagata ma toe vevesi ai o lea e faasauni taaloga a tama.
E lagona le faanoanoa o le susuga i le faia’oga ona sa iai lona manatu afai o le faai’uga lea ua iai, sa tatau ona faatali se’i avatu pe a foi mai, ae o lenei ua alu lava le latou malaga, ae ua telē le faaletonu lea ua aafia ai o latou faalogona.
Na saunoa Muliaga e na te lei ta’uina i tama le mea ua tupu pau le mea na laualuga ia te ia ma le pulega o le tapena lelei tama mo le taaloga, ae na o latou le pulega na talatalanoa ma le faanoanoa i le tulaga ua taunuu iai le tautiga sa fai mo le ‘au a le atunuu.
O le a tuliloaina pea lenei mataupu pe a maua se avanoa e aumai ai foi se tala mai le itu a le Komiti Faatonu o le Lakapi Samoa.
