I le tauaofiaga a le Palemene i le taeao nei na faataunuu ai le faatautoga o le sui faipule filifilia o le Itumalo faapalota a Gagaifomauga Nu. 2 le afioga ia Fo’isala Tuu Ioane.
I lana lauga faataupou na faailoa ai e Foisala le tāua o le galulue faatasi o itu e lua ae lē gata i lea e lē o iai ni ona mana’oga fou mo lona itumalo pau lona mana’o ina ia faaauau le tele o galuega na faia e le sui a le Itumalo lea ua fai i lagi le folauga le afioga ia Va’ele Paiaaua Sekuini Iona.
E pei ona silafia o le sui fou lea na tauva i le faigapalota laititi a le Itumalo Gagaifomauga Nu. 2 e saili ai so latou sui faipule ma i le i’uga na sola ai Fo’isala ma le manumalo i palota e 441. O le aso ananafi na momoli aloa’ia ai lea sui faipule i le vaega faaupufai a le Faatuatua i le Atua Samoa ua Tasi, o le vaega filifilia lea e tautua ai Fo’isala mo lona itumalo.
