Ua amata faatino nei tiute o le tasi o faamasino o le Faamasinoga o Fanua ma Suafa i le tauaveina o le tulaga Peresetene Lagolago, le afioga Faumuina Le Tupufia Opapo Soana’i Oeti, ina ua mae’a ona faatauto i luma o le Peresetene o lea faamasinoga le afioga Lesatele Rapi Vaai.
O le Aso Gafua o lenei vaiaso sa faia ai le sauniga o le faatautoga lea sa auai afioga i faamasino o le Faamasinoga o Fanua ma Suafa faapea le Faamasinoga Maualuga a le atunuu.
O le afioga i le Peresetene lagolago filifilia na tofia faatasi ma le tamaitai faamasino le afioga Leituala Mesepi Sialaoa e tauave le tulaga peresetene lagolago e pei ona mae’a faatauto le afioga Leituala Mesepi i le vaiaso ua mavae.
O le afioga Faumuina Le Tupufia Opapo ua lima tausaga talu ona avea ma Faamasino o le Faamasinoga o Fanua ma Suafa, i le tuanai o le 22 tausaga o galue i le tofiga faifeau mo le Ekalesia Faapotopotoga Kerisiano Samoa le EFKS.
