O le tamaitai talavou o Dvora Etta Oswald, o le alo tamaitai ulumatua a Faamaualalo Robert Patrick ma Merina Oswald o Letava-Vaoala o Samoa ma Tafuna i Amerika Samoa, na faatauto i le Aso Tofi o le vaiaso talu ai, i se sauniga na faia i le ofisa o le Amepasa a Amerika i Apia e pei ona faatautaia e le United States Navy poo le vaega o le Fuāvaa a le fitafita a le Iunaite Setete o Amerika.

Ma o ia foi se uluai tagata ua faatino mamao atu i lona atunuu moni lona faatautoga e aloaia ai lona pasia o togi ma suega uma sa ia faagasolo mo le ausiaina o lona tofiga ua iai nei.

O le amataga o le tausaga nei na ta’ua le agai atu ai o Oswald i Amerika Samoa ina ia a’oa’oina i le U.S. Armed Services Vocational Aptitude Battery (ASVAB), ma ina ia ua ia mauaina togi e pasi ai, ona see atu loa lea i le tagata a le Navy e sailia tagata e faafaigaluega (Navy recruiter), ina ia faamautinoa mai ai le agavaa o le tamaitai mo le galuega ma ia faia foi ni suesuega i lona malosi i le tino, o mea uma ia e tāpā mai pe afai o le a auai atu i le U.S. Navy.

O le masina o Iuni na faamae’a ai ma pasia uma suesuega o lona soifua manuia (physical examination) sa faia i Honolulu Military Entrance Processing Station (MEPS), peitai e lei maua ai iina se avanoa e faatauto ai i le militeli.

Na toe taliu mai Oswald i lona aiga i Vaoala, i Samoa, a o galulue ai pea ona Navy Recruiters, o Petty Officer First Class Seumanu Faanofoilefagaoalii Dorothy Alesana-Voigt ma Petty Officer First Class Jesse Kaulia, faatasi ai ma Navy Classifiers i le Honolulu MEPS, ina faamautu lana konekarate ma faatulaga ai lona faatautoga e fai atu lava i lona atunuu moni o Samoa.

Ma ua tulai mai ai o ia se tagata muamua ua faataunuu mamao atu lava lona faatautoga mo le U.S. Navy i Samoa, ua auai atu ai nei o se Aviation Boatswain’s Mate, Handler i lalo o le Aviation Department i le U.S. Navy.

O Colonel John M. Sova mai le Uniterd States Defence Attachè Office i Ueligitone, i Niu Sila na malaga atu i Apia e na te faia le faatautoga mo lenei alo tamaitai o Samoa.

O Oswald na a’oga o ia i le Kolisi o Pesega ona toe faaauau atu lea o ana a’oa’oga i le Kolisi o Samoa, o iinā na faauu ai loa i le tausaga e 2022.