O le toe tauaofiaga a le Palemene i le asō na tomua ai le sauniga i le faatautoina o le afioga i le Ao Mamalu o le Malo ua toe filifilia mo le lima tausaga mulimuli, e atoa ai le sefulu tausaga o lana nofoaiga i le tofi e pei ona aiaia i le Tulafono Faavae, le afioga Tuimalealiifano Vaaleto’a Sualauvi II.
O le faatautoga na faatinoina e le afioga i le Faamasino Sili, Satiu Simativa Perese, ma sa auai uma ai i lea sauniga mamalu le Sui o le Fono o Sui Tofia, le afioga Le Mamea Ropati Mualia, le Fofoga Fetalai ma le Masiofo a lana afioga i le Ao Mamalu o le Malo, faapea le aofia atoa a le Palemene o Samoa, o faauluuluga o matagaluega a le Malo ma isi uma aiga ma i latou na auai atu e tapuaia lenei sauniga o le faatautoga.
O le sauniga o le a muamua asiasi ai e le Ao o le Malo filifilia le tulai faaaloalo a Malu o le Malo, ona afio ai lea i le Maota Fono mo le sauniga lotu ma le faatautoga.
Ua faailoa e le failautusi o le fono le faataga e le Fofoga Fetalai o masini pu’eata video ma masini pu’eata a faletelevise ma mea pu’eata a le aufainusipepa i le taimi o le sauniga, ae matua tapu ona faaaoga mea pu’eata o telefoni feavea’i.
O loo faasaina pea ona pu’eata a le autusitala ma le aufaasalalau i totonu o le maota fono i taimi o taualumaga masani a le Palemene ae ua na o le faatautoga o le Ao o le Malo ua faataga ai.
O le mae’a o lea sauniga e faato’ā faagasolo ai taualumaga masani a le Fono Aoao i ana galuega ua faatulagaina.
