Ua faaopoopo atu le afioaga o Falelauniu Tai i nuu uma mae’a a latou talomua ina ua faataunuuina le latou faaliga i le vaiaso nei.
Na vaaia le agai atu o tagata mai afioaga latalata ane i Falelauniu Tai e molimauina lenei faamoemoe o le faalauiloaina lea o fua o faaeleeleaga, o fualaau faisua ma fualaau’aina ae lē gata i lea o laau eseese.
O le susuga i le faafeagaiga ia Pastor Tavita Kapeli ma faifaatoaga o lana Ekalesia na tuufaatasia lea faamoemoe ma na ia ta’ua o se galuega o le a faaauau pea i totonu o le afioaga aemaise le Ekalesia.
Na ave le faamalo a le Minisita o Faato’aga ma Faigafaiva Laauli Leuatea Polataivao i le afioaga ma faifaato’aga uma mo le galuega fitā ae lē gata i lea na fautuaina le afioaga i le faapaaga a le Malo ma Falelauniu o se gaioiga o le a penefiti ma manuia ai tagata o le nuu.
O nei fua o Faato’aga ma fualaau’aina ma fualaau faisua sa faimeaalofa ai le afioaga i le Maota o Monike i Vailima faapea le nofoaga o Tagata Matutua i Mapuifagalele.
