Ua mae’a faalauiloa le tapenaga o faiga faavae ma ta’iala e tafiesea ma tetee atu ai i faiga faaalatua poo se Anti-corruption policy and strategy, e pei ona sa faatino le faalauiloaina o ia faiga faavae ma ta’iala i le tausaga nei.
O le aso 9 o Tesema i tausaga uma ua avea ma aso faavaomalo e faatāua ai le tetee atu i faiga faaalatua poo gaioiga piopio, e pei ona sa faatāua e le komisi o tagata faigaluega a le malo i se mafutaga sa auai nisi o tagata faigaluega sinia a le malo lea sa taulamua ai le Ta’ita’ifono o le komisi a tagata faigaluega poo le Public Service Commission, le afioga Nonu Lemauga Saleimoa Vaai.
O loo faaalia e le minisita o le komisi le afioga i le Tamaitai Palemia, Afioga Fiame Dr Naomi Mataafa i le tusi ua fofola ai faiga faavae ma ta’iala e tetee ai faiga faaalatua mo le lima tausaga amata atu i le tausaga nei 2024 e oo i le 2029, o le tasi lea o manulauti a lana pulegamalo ina ua pale i le mae’a o le palota tele o le 2021, o le unaia o pulega lelei, manino ma le faimeatonu i totonu o auaunaga ma tautua eseese a le malo.
O loo faaalia e le Ta’ita’ifono o le komisi o tagata faigaluega a le malo i auala o fesoota’iga televavave a le komisi, o le faatāuaina o lea aso i Samoa o se faamanatu tāua lea o se tasi o poutū o pulega lelei auā o se matafaioi fai faatasi a tagata uma le galulue faatasi e mafai ona ausia ai pulega lelei.
Ua ono nei masina talu ona mae’a faalauiloa e le ta’ita’i o le malo le tusi o faiga faavae ma ta’iala e tetee atu ai faiga faaalatua, ma o se tasi lea o galuega o loo feagai ma le komisi o le tapenaina o le lotoifale mo le faatuina o se itutino na te su’esu’eina faiga faaalatua i totonu o le malo poo se Anti-Corruption Agency.
