O le manulauti o faiga faavae a le faigamalo ua tu nei i le foe, ia auai ma faatāua tagata uma i fuafuaga o le atiina a’e o le tatou atunuu, e pei ona ave le faatalauula i pulega a nuu ma afioaga i itumalo uma o Samoa, e tuuina atu ni suafa o matai Sa’o, faapea faletua ma tausi ua iloga ni galuega ma ni tautua ua latou faia mo le nofo lelei o tagata aemaise o galuega ua manuia ai nuu ma afioaga o itumalo.
O le susuga Seiuli Tulimasealii Moala o se matai tausi aiga o le sui o le atunuu i le komiti o faailoga ma pine taualoa, na ia faailoa i le feiloaiga ma tusitala le tāua o le amanaia o tautua a soo se tagata i totonu o nuu ma afioaga, ma e tatau ai ona faailoa atu mo le tuuina atu iai o le faaaloalo maualuga a le Malo.
Le susuga Seiuli Tulimasealii Moala, o le sui o le atunuu i le komiti o faailoga ma pine taualoa a le Malo.
O le faaiuga o le masina lenei o Ianuari e faamuta ai le avanoa e tuuina atu ai suafa o nisi e agavaa ma talafeagai ona ave iai lea faaaloalo maualuga.
O le Ofisa o le matagaluega a le Palemia ma le Kapeneta e fesootai iai mo faamatalaga uma o lea faamoemoe tāua o le Malo.
