E to’alima leoleo o le falepuipui i Tanumalala ua latou ioeina moliaga o le faatamala i le faatinoga o o latou tiute, e mafua i le sola ese mai le falepuipui i Tanumalala o le pagota o Lauititi Tualima.
Ua faailoa e le Komesina o leoleo ua faamālōlō lē tumau ia leoleo o le falepuipui mai le 2 vaiaso ma le ta’i vaiaso e aunoa ma le maua o ni o latou totogi.
O le taimi sa maua e pagota e tatala mai ai o latou potu o loo loka ai e auai i le polokalame o le toe fuata’ina o olaga i totonu o le falepuipui, o le avanoa lea na faaaogā e Lauititi e sola ese ai ma le falepuipui.
E silia i le masina o sa’ilia ae ua toe maua ma faafoi atu e faaauau ona tuli lona faasalaga i le to’ese.
Na faaalia e le Komesina le tofa Auapaau Logoitino Filipo, o loo faaauau pea su’esu’ega i ni tagata o loo tuua’ia i lo latou faalafi o lea alii pagota e pei ona maua i se nofoaga i A’ele, o se nuu e i ga’uta o Faleula.
O loo tuua’ia ai se alii sa tuli sona faasalaga i le falepuipui i lona fesoasoani e ave ane i A’ele Lauititi mai Satapuala sa laumanu’ia o loo faamautū ai a o i tua i lana sola’aga mai le falepuipui.
