O nisi o suiga i fale mautotogi ua fuafua e faapaleni ai mo le toatele o tagata mautotogi poo tenants o le a folasia i le Palemene a Niu Sa Uelese i le vaiaso nei ae ua ta’ua o le a leai se mapusaga mo i latou o loo feagai ma tau maualuluga ua oo iai fale mautotogi.
O le faigamalo a le Premier fou ua iai nei Chris Minns o loo ave le latou faamuamua i se sā e faia i tauofoga faalilolilo e faatatau i rents, poo le secret rent bidding atoa ai ma fetuunaiga i le totogiina o bonds i lenei vaitau o le tele o luitau o feagai ma tagata i le setete ona o fale mautotogi.
Ua ta’ua i lipoti a le ABC o se tulaga le paleni o iai i le sapalai o fale ma le manaoga o tagata mo fale mautotogi ua atili siitia ai le aofai o rents atoa ai ma le siitia o le aofai o tagata malaga mai i totonu o le atunuu ma le faatuai i le fausiaina o fale fou.
O le vaiaso talu ai i le fonotaga a le Kapeneta sa faatonuina ai e le Palemia sui mai setete ma teritori i le atunuu ina ia faalautele fuafuaga mo le faamalosia o aiātatau a tagata mautotogi i le atunuu.
O loo fautuaina uma e le faigamalo o iai nei ma le NSW Greens o loo latou finau mo le taofia o totogi o fale mautotogi.
O loo faatalitalia foi la se faatatau a le malo i le faiga o bonds totogi e tagata mautotogi lea o loo feta’ua’ina o le a le toe tau totogiina ni bonds se lua i le taimi e move ai ae na o le tasi lava le bond lea e mafai ona feme’ia’i i le va o fale e mautotogi ai le tagata.
