Afioga i le Fofoga Fetalai, Susuga Papalii Li’o Oloipola Ta’eu Masipa’u
Afioga i le Fofoga Fetalai, Susuga Papalii Li’o Oloipola Ta’eu Masipa’u

Faatali se faaiuga a le Fofoga Fetalai i le tusi faitio a le Sui Palemia

Ua talia nei e le Palemene ma le atunuu se faaiuga a le afioga i le Fofoga Fetalai susuga Papalii Li’o Oloipola Ta’eu Masipa’u i se faitioga ua faaulu e se sui faipule o le fono aoao faitulafono faasaga i ni sui faipule o le Palemene.

E lei faailoaina e le Fofoga Fetalai i lana faasilasilaga i le maota fono o le Palemene poo ai le sui faipule e ana le faitioga, a o ā foi ia faitioga. Na faapena foi ona lei faailoaina e le Fofoga Fetalai faipule o loo faatutu iai le faitioga.

Peitai o le feiloaiga a tusitala ma le taitai o le Itu Agai i le Aso Faraile na tea nei, na faailoa ai e le susuga Tuilaepa L Sailele Malielegaoi, o ia ma le tofa Lealailepule Rimoni Aiafi o loo agai atu iai le faitioga. Ua faailoa ai foi e Tuilaepa o lea faitioga o loo agai i o la moliaga o le faalemigao i le faamasinoga.  

O le 4 o le afiafi o le Aso Gafua e tatau ona faaoo ai i le Fofoga Fetalai ni tali a sui faipule ua faasaga iai le faitioga, ma aumai ai se faaiuga a le Fofoga Fetalai i le Aso Lua o lenei vaiaso, pe a toe tauaofia le fono usu a le atunuu.  

Ua taulimaina e a tatou tala mai Samoa se faamaoniga ua faailoa ai, o le Sui Palemia le afioga Tuala Tevaga Iosefo Ponifasio ua ia faato’ai i le ofisa o le Fofoga Fetalai le faitioga faasaga i le taitai o le Itu Agai ma le sui faipule o Faleata Numera 3 le tofa Lealailepule Rimoni Aiafi.

O le a maua se auiliiliga ma se aotelega o le faitioga a le sui faipule o Gagaemauga Numera tasi pe a mae’a faalauaitele se faaiuga a le Fofoga Fetalai. 

Scroll to Top

Keep uptodate with Radio Samoa activity & promotion

* indicates required