I le silia ai nei i le tausaga ma le fitu masina o nofo taofia ai pea i le vaaiga a leoleo i le falepuipui i Tanumalala le tama’ita’i e iai ona tomai i le tusia o tala ma solo fatu, o Papalii Sia Figiel.
O le mae’a ona su’esu’eina o ona moliaga e fesoota’i i le maliu o le tama’ita’i polofesa o Dr Caroline Sinavaiana Gabbard o Amerika Samoa, o lea ua faatali nei Fepuari o le tausaga fou 2026 e aumai ai se faai’uga a le Faamasinoga Maualuga o le a iloa ai le faamaonia ma le lē faamaonia o moliaga a leoleo.
O le Aso Gafua o le vaiaso nei na tuuina atu ai i luma o le faamasinoga folasaga ma finauga faai’u a loia a leoleo ma le loia o loo tula’i mo lē o loo molia.
O loo teena uma e Papalii Sia Figiel moliaga e lima a leoleo e aofia ai le fasioti tagata faamoemoeina, fasioti tagata pa’ivalea, lua moliaga o le umia o se ‘au’upega mata’utia e faasino atu i se tama’i agaese ma le samala, ma le moliaga o le faaoomanu’a tugā.
O Me o le tausaga e 2024 na tula’i mai ai le solitulafono i le fale o lē ua molia i Vaivase uta, ae o Aokuso o le tausaga nei na su’esu’eina ai molimau a leoleo.
