Ua i luma nei o le Faamasinoga Maualuga folasaga ma finauga a le loia mo le vaega faaupufai e puipuia aiā tatau a tagata i le talosaga a le Itu Agai ua tatau ona sa’ilia le nofoa e atoa ai le to’aono o tama’ita’i e tauaveina tofi faipule o le Palemene e tusa o le malosi’aga o le vaega 44 o le tulafono faavae.
I le folasaga a le tama’ita’i loia le afioga Savalenoa Mareva Annandale-Betham mo le itu talosaga sa ia finauina ai o loo manino lea vaega o le faavae e mae’a loa le palota tele ona tuuina atu lea e le Komesina o faigāpalota o le lisi o suafa o sui ua avea ma faipule i le Ao o le Malo mo lana faamaoniga, ma e aofia ai foi ma le faamaoniga o le sui tauva tama’ita’i e atoa iai le to’aono o nofoa o faipule tama’ita’i pe afai e le’i maua lea numela i le faai’uga o le palota.
O loo fua lea finauga i le taunuuga o le palota tele ia Aokuso e na o le to’alima sui tauva tama’ita’i na manumālō ma mana’omia ai le to’atasi e atoa ai le to’aono e pei ona aiaia i le Vaega 44 o le faavae lea e faasino i le 10 pasene.
Peita’i o loo finau le Loia Sili a le malo o loo tula’i mo le Komesina o faigāpalota ua vavevave le mana’oga o le itu talosaga ae o loo taoto le faai’uga a le Faamasinoga o Talosaga a le Faamasinoga Maualuga na faia i le masina o Iuni i le mae’a o le palota tele o le 2021 o loo faapea mai ai e faato’ā faaaogā le Vaega 44 o le faavae e faasino i le 10 pasene e sa’ili ai le faaatoaina o nofoa e ono o tama’ita’i, pe a mae’a ni tagi o le palota ma ni palota laiti poo byelections.
O loo lagolago lea finauga e loia mo le itu faaupufai o le Faatuatua i le Atua Samoa ua Tasi.
Ua faailoa e le afioga i le faamasino o le Faamasinoga Maualuga le afioga Leiataualesa Darrel Clarke o le a aumai lana faai’uga a o le’i oo i le tauafiafi o le aso Kerisimasi.
