Ua faatali nei le atunuu i se finagalo o le Palemene i se faai’uga o le lafo lona lua o le lē faatuatuaina o le ta’ita’iga a le tamaitai Palemia le afioga Fiame Naomi Mataafa ma lana Kapeneta, e pei ona tuuina atu e le sui faipule o Gagaifomauga 3 le ta’ita’i o le vaega faaupufai o le Faatuatua i le Atua Samoa ua Tasi le susuga Laauli Leuatea Polataivao Fosi Schmidt.
O le finagalo o le Fofoga Fetalai e faasolo muamua galuega a le fono i teuteuga o nisi o tulafono, ona faato’ā talanoaina ai lea o lea lafo, sa lē talia e le ta’ita’i o le Malo i le finagalo o le afioga Fiame Naomi Mataafa, e lē aogā ona alu loa le galuega ae o loo faamalumalu mai le lafo o le lē faatuatuaina.
I taualumaga faaauau a le fono aoao i le Aso Gafua o lenei vaiaso na tula’i mai ai lea feteena’iga i le finagalo o le Fofoga Fetalai ma le ta’ita’i o le malo, ae sa tulai le ta’ita’i o le itu agai ma ia lagolago le finagalo o le Palemia, e ui sa finau le faipule o Gagaifomauga 3 e tatau ona usita’ia le finagalo o le Fofoga Fetalai.
O le mafua’aga lea o le faamuta o taualumaga a le fono i le taeao o le Aso Gafua ae e le’i leva ona amata, ae faia le faai’uga a le Fofoga Fetalai e talanoaina le lafo i le Aso Lua o le vaiaso nei lava ma o le mataupu lea e amata ai le fono usu a Samoa.
O loo lagolagoina e le ta’ita’i o le Itu Agai le lafo lona lua o le lē faatuatuaina ae e iai teuteuga sa mana’omia.
Sa iai feutana’iga i le Aso Gafua i le va o le ta’ita’i o le Itu Agai ma le tamaitai Palemia ae faato’ā tatou iloa se faai’uga o ia taumafaiga i se finagalo e taunuu iai le Fono Aoao Faitulafono i lana fono usu o lenei Aso Lua.
