O le pemita fitu aso ma le 30 aso mo tagatanuu o Samoa Tutoatasi e fia ulufale i le teritori o Amerika Samoa ua iai fuafuaga i le va o Malo e lua, e faapafala nisi o aiaiga sa faia muamua, i le naunautaiga e faafaigofie le femalagaa’i o o tatou tagata, ae ia aveese foi nisi o aiaiga tau tulafono o femalagaa’iga a Samoa mo tagata o le teritori e fia malaga ma ulufale i o tatou laufanua.
Na toe tuliloa le mataupu lenei i le fesiligia o le tamaitai Palemia o ia o le minisita o mataupu tau femalagaa’iga ma ia faailoa ai, e ao pea ona faatalatalanoa atili ina ia matuā ma’oti lelei aiaiga e avanoa tutusa ai tagata femalagaa’i i le va o Samoa e lua.
Le afioga i le tamaitai Palemia o le Minisita o mataupu tau femalagaa’iga, afioga Fiame Naomi Mataafa.
O le masina o Oketopa o le tausaga nei e usuia ai i Samoa le isi fono o le Atoa o Samoa o le a toe asiasi ai talanoaga i le va o taitai o faigamalo a Samoa e lua i mataupu tau femalagaa’iga ma nisi o mataupu mo le galulue faatasi o faigamalo mo le manuia o ona tagata.
O le fono lea ua iai le fuafuaga o le a faia i Puleono i Salafai.
