O tausaga e tele ua mavae sa afea Samoa e vaalele o le kamupani vaalele a le atunuu o Nauru, le vaitau lea sa fai paaga ai ma le tatou kamupani vaalele o le Polenisia.

I le tuanai ai o na tausaga ma mea sa tutupu ai a o tatou fai paaga ma le kamupani vaalele a lea malo tuaoi, o lea ua faailoa i le upega tafailagi a le matagaluega o galuega tetele a le Malo o loo iai ma vaalele sivili, le faia ai o ni faatalanoaga a le Minisita o lea matagaluega le tofa Olo Afoa Fiti Vaai, ma sui o le pulega o le Air Nauru i le ofisa o lea kamupani vaalele i le aai o Bribane i Ausetalia.

Ua faailoa i se faamatalaga i luga o lea upega tafailagi, afai ae sologa manuia talanoaga o loo faia o le a ono toe faia ai ni malaga a lea kamupani vaalele e agai mai i Samoa, aemaise le faaaogāina o se vaalele tele 737-800 o lea kamupani vaalele e ave ai uta o oloa mai Samoa mo isi atunuu.

O talanoaga nei na faia i le amataga o le vaiaso nei i le va o le Minisita o vaalele sivili a Samoa ma le Minisita o le kamupani vaalele a le Malo o Nauru.

O loo iai le naunautaiga e pei ona faailoa i le faamatalaga i le upega tafailagi a le matagaluega o galuega tetele ma vaalele sivili, o le a fua mai i ni fua lelei mataupu ua faatalanoa i le va o malo e lua.