E faato’ā mafai ona toe faaaogā e le ta’ita’i o le Itu Agai i totonu o taualumaga a le Palemene o Samoa lana mata tioata pogisa pe a tauaao e le Fofoga Fetalai se pepa faamaoniga mai se foma’i e faamautū atu ai ni faaletonu i fofoga o le susuga Tuilaepa L Sailele Malielegaoi.
O se tasi lea o faai’uga a le Fofoga Fetalai le tofa Auapaau Mulipola Aloitafua Mulipola i lana folasaga amata ina ua toe tauaofia le fono usu a Samoa i le Aso Lua o lenei vaiaso.
O le folasaga lea na faailoa ai foi e le Fofoga o le fono lona lē talia o se gaioiga a le ta’ita’i o le Itu Agai sa ia faia ai ni tuua’iga lē sa’o ia te ia ma lana galuega fai i ana faasalalauga i upega tafa’ilagi.
Se vaega o le saunoaga amata a le Fofoga Fetalai i taualumaga a le fono aoao faitulafono i lenei vaiaso, lea ua lapata’ia ai le ta’ita’i o le Itu Agai ma tapu ai ona toe faaaogā lana mata tioata pogisa, se’ia vaganā ua iai se faamaoniga mai se foma’i e faailoa atu ai le māfua’aga e tatau ai ona faaaogā.
