O le Aso Lua o lenei vaiaso o le a faataatia ai le tala autū o le tupe lona 2 a le faigamalo o le Faatuatua i le Atua Samoa ua Tasi i luma o le laulau a fono a le Palemene, ma o le a folasia ai e le tamaitai Minisita o le Tupe fuafuaga a le Malo mo le isi tausaga faaletupe fou e amatalia i le masina o Iulai.
O le a faataoto ai foi ma le ta’i miliona tala mo itumalo palota e 51 mo le faatupeina o polokalame o le atiina a’e o itumalo ta’itasi e pei ona pasia muamua ai i le tala autū muamua o le tupe le sefulu miliona mo le tuuina atu o vaegatupe ta’i 200 afe tala e avea o se tupe faavae o lea polokalame a le faigamalo fou.
O le a faamanino ai e le Minisita o Tupe le afioga Mulipola Anarosa Ale Molioo le faatupega o lea fuafuaga i le faato’ā faatino ai o le ta’i miliona tala mo itumalo faapalota. O nisi o fuafuaga ma tupe ua fuafuaina mo le faaaogāina e matagaluega ma faalapotopotoga a le Malo o le a folasia i le tala autū lona lua o le tupe, ma o le a faato’ā talanoaina e le Palemene pe a mae’a le 14 aso.
