O le maua e le atunuu atoa o se kerisimasi fiafia ma amatamea le Palemene i le tausia o le filemu, o nisi ia o māfua’aga o le lē faailoaina e le malo o sana tapenaga sa fuafua e taualuga iai le fono faai’u o lenei tausaga a le Palemene.
Sa faailo i le saunoaga faaminisita a le Palemia nisi o vaega tāua e tatau ona galulue faatasi ai le Palemene ma le pulega a alii ma faipule ma ekalesia aemaise le atunuu o fuālaau faasāina, ma le faaaogāina o upega tafa’ilagi poo fesoota’iga faaonaponei le social media.
O ia fesoota’iga e pei ona saunoa le Palemia susuga Laaulialemalietoa Leuatea Polataivao Fosi Schmidt, ua faatupu maseiga ma ua aliali ai le taufaaleaga ma le foumalo.
Sa faailoa e le ta’ita’i o le malo ma se tapenaga ua fautuaina ai le Loia Sili e tapena ni tulafono e faatonu folau ai ia sagatonu ia tulaga.
E ui sa faailoa e le Palemia le taualuga o le Palemene i se tapenaga a le faigāmalo i ni aulape o le taufaaleaga ma le foumalo, ae sa ia faailoa i lana saunoaga na taualuga ai le fonotaga mulimuli o lenei tausaga, o le a toe faaee foe mo le a’e.
Le afioga i le Palemia, Susuga Laaulialemalietoa Leuatea Polataivao Fosi Schmidt.
Ua tolopō nei taualumaga uma a le fono aoao faitulafono se’ia aulia le Aso Lua, 20 o Ianuari o le tausaga fou 2026.
