A o faaauau ai ona faasoasoa le auaunaga a le eletise i vaega eseese o le motu o Upolu, ua faailoa e le faalapotopotoga o le malosi faaeletise ata o galuega ua tapena ai se nofoaga o le a faamautū ai afi eletise e lima o le a faaaogā faavaitaimi, ina ia fesoasoani i le mauaina o lea auaunaga ma tau maua ai se to’afilemu o loto o tagata i le faaletonu ua alu ma pē ai ma motusia le eletise, ae sa lē masani ai.
O ia afi ua faamoemoe e taunuu i Samoa i le Aso Toonai o le vaiaso a sau le aso 5 o Aperila.
O le faaaogā ai o ia afi eletise, ua iai le fuafuaga e toe faafoi i le kamupani o le Aggreko NZ pe a mae’a faapipii afi fou e lua o le a taunuu i Samoa i le masina o Aokuso.
E ui ina lagomia lagona o le to’atele ma faitioina le tulaga faaletonu ua iai nei le auaunaga tau eletise i le motu o Upolu, ae o loo to’atele foi o loo faafetaia le aufaigaluega a le faalapotopotoga o le malosi tau eletise, ona o loo molimauina le galulue ma le lē faalogologo tigā e tali atu i le tau togafiti o faaletonu ua aafia ai le motu o Upolu ona o le motusia o le eletise.
