E telē le tāua o le malaga mai ai i lo tatou atunuu o ni sui o le asosi o tamaitai o loo galulue i totonu o falepuipui i Niu Sila, ona ua latou molimauina ai le faagaioia o tiute o alii ma tamaitai o le atunuu ua ofo o latou soifua e galulue ai i totonu o le falepuipui i Tanumalala ma le falepuipui i Vaiaata.
O le Aso Gafua o le vaiaso nei na talimalo ai le sui Komesina o leoleo o loo pulea ma vaaia le falepuipui i Tanumalala ma lana pulega ma sui o lea aumalaga lea sa muamua le ‘ava o le feiloa’iga ma faagasolo ai nisi o polokalame e pei o le asia o nofoaga uma o lea falepuipui.
Faaalia i se faamatalaga i auala o fesoota’iga a le matagaluega o leoleo, falepuipui ma le toe fuata’ina o se mafutaga tāua lea feiloa’iga auā ua fetufaa’i ai silafia ma tomai i le faatinoga o lea auaunaga, aemaise o le galulue faatasi o pulega o falepuipui i Niu Sila ma Samoa.
Na tauaoo ai e le aumalaga mai Aotearoa ni meaalofa o ofu ma seevae e faaaogā e leoleo o le falepuipui i Tanumalala.
I se isi o tala mai lea matagaluega, o le Aso Gafua foi o le vaiaso nei na afea ai e se au malaga o leoleo mai le setete o Kuiniselani i Ausetalia le matagaluega o leoleo a le atunuu. Faaalia o se asiasiga ua mafai ai ona silafia e ia leoleo o lea atunuu le tulaga o loo faatino ai galuega a Malu o le Malo i Samoa. Sa maua foi lo latou avanoa e asia ai le nofoaga autu mo a’oa’oga faaleoleo i Tafaigata lea na tatala aloa’ia i le masina o Aokuso o le tausaga nei.
