O le faamoemoega i le Malo e tauala atu i le Matagaluega o Faatoaga ma Faigafaiva ina ia maua avanoa e fefaasoaai ai le Matagaluega ma faifaatoaga ma i latou o loo tuuina atu oloa i fafo mo maketi.
O le fonotaga e pei ona tuuina i faamatalaga faalauaitele a le Matagaluega lea na faatino mo Upolu ma Savaii e tusa ai o se faigapaaga a le Poloketi o le Pacific Horticultural & Agricultural Market Access Plus Program (PHAMA Plus) ma le Matagaluega o Faatoaga ma Faigafaiva i lana Vaega o Laau Toto.
O le Sini Autu o lenei faatalatalanoaga ina ia saili manogi ma ao le tofa, i manatu ma finagalo a le Auaveoloa ma le Aufaifaatoaga o loo auina atu a latou talo mo maketi i fafo.
O nei faatalatalanoaga e ao ona faatino ma e moomia tele i le faamalosia pea o le galulue vaavaalua o le Matagaluega ma ana paaga au aveoloa ma faifaatoaga.
O le faamoemoe ina ia mafai ona tuufaatasia lagona ma finagalo e lagolagoina ai la tatou talosaga i fesoasoani mai le Poloketi o le PHAMA Plus, i se taumafaiga mo le siitia o le atina’e o le talo mo le fofoga taumafa, aemaise le tali atu i nisi o faafitauli o feagai ma le au Aveoloa ma le au Faifaatoaga o loo auina atu le talo i maketi i atunuu mamao.
