O le afioga ia Fuataga Tologataua Lagimalu Tauiliili, o se tasi o tamalii ua iloga lona silafia i le aganuu a Samoa.
Ma o loo iai ana polokalame o loo fai i Aso Lulu ma Aso Tofi i le mafutaga a le Tuaa Sinasina i Mt Roskill e ala lea i le faasoaina i uiga o upu Samoa poo alagaupu.
O le naunau o lenei tamā i le tāua o le gagana Samoa ma le uiga o upu poo alagaupu na ia taumafai ai e saili atu i le malo auā se seleni e faataunuuina ai se polokalame o le gagana Samoa i le atunuu e fa’ifa’i mai ai manatu ma sasaa mai le tofa i tamalii e faasoa ai i le uiga o upu Samoa ma lona mafuaaga faatasi ai ma lona faaaogāina.
Na tatala mai le avanoa mai le malo ma tuuina mai ai le seleni e $5000 ma o lea sa faataunuuina ai loa se polokalame faaa’oa’oga i le Aso Tofi ua mavae le aso malolo o le ANZAC Day e faatalatalanoa ai le tāua o le gagana a le atunuu.
Na tumutumu lea aso i tamā ma tina matutua faapea nisi o tupulaga talavou sa agai atu e faalogologo ao tatala le avei mai ato ponapona a toeaiina matutua ua lava le tofa i le aganuu a Samoa.
O le afioga ia Fuataga Tologataua na faatautaia le faamoemoe i lea aso auā o ia e auga tonu i ai lenei polokalame.
Sa malie i le faalogologo le faasoa a le atunuu, i alagaupu sa tuuina mai i lona mafuaaga ma lona faaaogāina.
Ae sa mau eseese foi le tofa a tuaa sinasina sa auai i le tele o alagaupu i lona mafuaaga.
E ui i le mau eseese o lagona o tuaa matutua sa iai ae sa malie lava le faasoa i le faamoemoe e pei ona faataunuuina.
O le tāua ma le auga o aute, ia mafai ona malamalama tagata ma tupulaga talavou i alagaupu i lona mafuaaga faatasi ai ma lona faaaogāina.
O loo iai le lagona o le afioga ia Fuataga Tologataua Lagimalu Tauiliili e iai se isi polokalame faapenei pe a toe maua mai se isi seleni mai le malo auā lava le faasoa o manatu o le atunuu i le tāua o lana gagana ma lana aganuu.
