O le siisii ai pea o le suasami o se tasi lenei o faafitauli o loo atagia ai suiga o le tau ua iai nei ma o se faafitauli tele lea i atumotu o le Pasefika.
I pepa o faamatalaga mai le Ofisa o le Siosiomaga a le Pasefika (SPREP), o le faamoemoe lea o le auai ai o sui o ofisa a Malo ile Pasefika, faalapotopotoga o le vaega o suesuega ma i latou o loo galulue i le vaega o suiga o le tau lea o loo i Fiti e faatautaia ai se tasi o aoaoga mo mataupu o loo aafia ai vaega o le talafatai ma motu i le siitia ai o le suasami.
I le saunoaga e tatala aloaia ai lenei faamoemoe, na saunoa ai le Faatonu a le SPREP Sefanaia Nawadra.
“E pei ona iai le lapataiga sa tuuina mai e tusa ai o le lipoti lona 6 a le Intergovernmental Panel of Climate Change o le siitia ai o le suasami o loo aumai ai le telē o le aafiaga i atumotu laiti faatasi ai ma lologa ma e ono afaina ai le soifua o tagata lautele.”
Na ia ta’ua ai, “o le tele a o faatalatalanoaga ma aoaoga o loo faia nei auā lo tatou tali atu i nei suiga o le tau o loo lolofi mai o le mea e faamuamua o le galulue faatasi e faasoa atu lo tatou tomai.”
“O manatu e faufau ai la tatou tali atu i faafitauli e mautinoa ai le mauaa o la tatou galuega a o tiute mo le puipuia ai o tatou tagata.”
O lenei faamoemoe o loo lagolagoina lea e le Ofisa o le Siosiomaga ma le Ocean & Climate Platform.
