E lima eka le telē o le fanua ma le faletalimalo o loo iai le Orator Hotel i Ululoloa, ua faailoa lautele le faatau ese atu e le Faletupe o Atina’e a le malo o Samoa.
E valu miliona valu selau tolusefulu afe ($8,830,000.00) le tau o loo faailoa e le Faletupe o Atina’e o loo fia faatau atu ai lea pisinisi tau faletalimalo, e māfua ona o nonogatupe sa faia a le pisinisi i lea faletupe o le malo ua lē lelei lona toe faaolaina.
Ua faatino foi lea gaioiga a le Faletupe o Atina’e i se isi faletalimalo le Tradition Resort ae e lē o faailoaina e le faletupe pe fia o loo faatau ai.
O le Aso Tofi o le vaiaso nei i le potu faamasino numera 4 o le Faamasinoga Maualuga i Mulinuu o le a faia ai le faatautu’i mo ia faletalimalo ma isi eleele umia sa’oloto i Laloanea ma Ululoloa.
O le tausaga e 2019 na lipotia ai se fuafuaga a lea faletupe e faatau atu ia pisinisi ma nisi o faletalimalo se lua e māfua lava o nonogatupe ua faigatā ona toe totogi.
Peita’i e iai se isi fetuuna’iga a le faigāmalo sa iai i lea vaitau ma ia pisinisi ma toe taofia ai le faatau atu, e māfua ona o aafiaga o le tamaoaiga i le faama’i Koviti-19 ma le misela.
O lea ua oo mai i le masina faai’u o lenei tausaga 2025 ae ua faataunuu le mana’o o le Faletupe o Atina’e o se tasi o auaunaga a le malo o loo avanoa ai pisinisi ma tagata lautele ona talosaga nonogatupe mo atina’e tau pisinisi e aofia ai ma faato’aga ma faigāfaiva.
