O se alii leoleo poo se malu o le malo, na faatulaga e na te su’esu’eina se matāupu a se tinā matua, ina ua sulu ane i leoleo mo se fesoasoani i lana teugātupe ua aveesea faagaoi ai se vaegātupe tele i ni faiga taufaavalea; peita’i ua i’u ane ua sili atu ona mafatia si nei tinā matua i lea malu o le malo, ina ua ia faaaogā le tulaga lē atoatoa o le malosi o le mafaufau o si tinā, ma auala na ia gaoia ai se vaegātupe tele mai lenei tinā.
O le taimi nei o loo taofia pea le faailoa faalaua’itele o le igoa o lenei malu o le malo, ae ua uma ona aumai lona faasalaga, ua sao mai le falepuipui ae ua faasalaina nei i le 11 masina e nofosala ai i lona lava fale (home detention).
O lea alii sa galue o se leoleo i Waikato, ma o ia na faatulaga e fesoasoani atu i se tinā matua penisione ina ua gaoia le $14,000 mai ana card talatupe, ae uma ane e $68,000 se isi seleni a si nei tinā ua gaoia e le alii leoleo.
Sa faatino nei gaioiga faasolitulafono a lenei alii a o iai i taimi o loo faatino ona tiute ma ofuina le togiga a leoleo; o taimi na e mulimuli atu ai lenei alii i lana taavale leoleo i tua o le taavale a le tinā, ona faatalitali atu lea i le kapaka, a o aga’i le tinā i lana faletupe e tala ane ai tupe sa faatalosaga e lenei alii.
E lua masina o fai e lenei alii lea solitulafono, ae faato’ā silafia e le tinā ua aveesea se vaegātupe tele mai lana tusitupe, ma ia faailoa ai i lana faletupe, ma oo ai loa le matāupu i leoleo.
O le tele o taimi e asiasi ai lenei alii i le fale o le tinā matua ma ia iloa ai aafiaga nei o le tinā, o lea na amata muamua ua fesili i le tinā mo ni vaegātupe tele e fesoasoani mo se ta’otoga e fai mo lana ta’ifau; mulimuli ane ua iloa e pepelo lena māfuaaga.
O nisi taimi ua alu sa’o loa i le fale o le tinā ma faaaogā le telefoni a le tinā e tatala ai le teugātupe a lea tinā i luga o le initaneti ma e matuā tetele ni vaegātupe na tala ese ai e lenei alii leoleo mai le teugātupe a le tinā, lea na uma ane su’esu’ega ma iloa ai e $68,000 le tupe na ia gaoia mai si nei tinā matua, e $12,000 le tinoitupe na tala i tua, ma le $56,000 sa transfer ese mai le tusitupe a le tinā ma teu atu i ana teugātupe.
Ua toe totogi atoa e le faletupe a le ANZ le seleni a le tinā na leiloa, ae ua faasalaina ai nei lea alii sa avea ma leoleo, i le home detention mo le 11 masina.
Puna o Faamatalaga: https://www.rnz.co.nz/news/national/589698/former-waikato-police-officer-sentenced-for-fleecing-68-000-from-vulnerable-victim?cid=newsletter
