Ua faasala nei e le faamasinoga le susuga Khamtan Stanley o se alii leoleo sa umia le tulaga faaleoleo o le satini, faapea le susuga Lomalasi Ulugia i ni sala tupe, ina ua faamaonia lo la moliaga sa o la ioeina o le faaoo manua i se alii talavou o le afioaga o Vaiusu na maliu mulimuli ane i le tuanai o lea gaioiga.
O le togisala lea ina ua talia e le faamasinoga maualuga le talosaga apili a le itu a leoleo, faasaga i le faaiuga a le faamasinoga faaitumalo na faapafala ai se faasalaga e aunoa ma le faamaonia o moliaga Khamtan ma Lomalasi.
Na saunoa le afioga i le Faamasino o le faamasinoga sili le afioga Leasatele Rapi Vaai i lana faaiuga, o le faasalaga faafalepuipui e talafeagai mo Khamtan Stanley pe a fua i le ogaoga o le gaioiga na ia faia, peitai o le faasalaga na faia i le nuu ma le faamaulaloga i le aiga o le ua maliu, aemaise o lona sao faatasi ma Lomalasi i le lauava, ua lava lea e faamauina ai le matuia o le solitulafono, aemaise o le tulaga o lana galuega o se Malu o le Malo o le a lē toe maua ona o le faamaonia o lana solitulafono ua manatu ai le faamasinoga e faasala tupe i le 3 afe tala, ma le tuutuuga ia ta le 4 o le afiafi o le Aso Faraile nei ua mae’a ona totogi, a le usitaia le poloaiga o le faasalaga o le tuuina atu loa i le falepuipui mo le 3 masina.
O Lomalasi Ulugia e maualalo le fua o lana solitulafono ma ua faasalaina i le 500 tala ma o le aiaiga foi ia totogi i le ofisa o le faamasinoga a o lei taina le 4 o le afiafi o le Aso Faraile. E lua vaiaso e nofosala ai i le falepuipui pe a le usitaia lea aiaiga o lona faasalaga.
