E to’alua ni taulelea o le isi ua 39 tausaga lona matua ae o le isi ua 44 tausaga lona matua, ua faia iai le faai’uga a le Faamasinoga Maualuga e nofosala i le falepuipui, ina ua faamaonia lo la ioe i le solitulafono o le umia o nakoti poo fuālaau faasāina.
O le masina o Tesema o le tausaga na te’a nei 2025 i se osofa’iga a leoleo i le fale o Tanielu Wilson i Moataa le tasi o taulealea ua nofosala, na maua ai e leoleo o ia umia fatu e 90 o le laau faasāina o le maruana, faapea o le laau faasāina e tusa lona mamafa ma le 4 tesimale 8 kalama, o le faasalaga maualuga pe a faamaonia e 14 tausaga i le falepuipui.
O le isi taulealea o Semu Foa’i na maua i le fale o Tanielu i le aso o le osofa’iga a leoleo sa ia umia se tagapepa iila laitiiti sa iai le pauta faasāina o le ‘aisa e tusa le mamafa ma le 0.02 kalama ma ni lau maruana e tusa ma le 2.82 kalama le mamafa.
O lo la ioeina o moliaga a leoleo o se itu lelei moi la’ua peita’i o Tanielu sa tuli muamua sona faasalaga i le falepuipui ona o solitulafono lava tau fuālaau faasāina.
I le faasalaga ua taunuu iai le faamasinoga, o Tanielu Wilson ua tuli le 27 masina poo le 2 tausaga ma masina e 3 i le falepuipui ae o Semu Foa’i ua faasala i le 15 masina e falepuipui ai.
O le tau faai’ui’uga o le tausaga ua mavae faasolo mai i le amataga o le tausaga nei e le’i toe solomuli leoleo i le faia o osofa’iga i fale ma nofoaga o loo masalomia le faafailele ai o solitulafono e fesoota’i i le umia o nakoti poo fuālaau faasāina.
