Ua taunuu le Faamasinoga Maualuga i lana faai’uga e faasala i le falepuipui le to’a sefulutasi o tama tane o le nuu o Lefagaoalii e aofia ai ni matai ma ni taulele’a, ina ua faamaonia o latou moliaga o le ave faamalosi o se matai o le nuu e aunoa ma se maliega o lea tagata.

O isi foi o i latou ia e to’asefulu tasi ua faia iai le faasalaga faafalepuipui ina ua faamaonia o latou moliaga faaopoopo o le faaoolima.

O le Aso Tofi o le vaiaso nei na aumai ai lea faai’uga a le afioga i le faamasino o le Faamasinoga Maualuga, le susuga Leiataualesa Darrel Clarke, ina ua mae’a ona su’esu’e nisi o vaega o tolaulauga a leoleo sa teena e i latou ua faasalaina.

Sa taofia uma i latou i le vaaiga a leoleo talu mai le masina o Tesema o le tausaga ua mavae e faatali ai le faai’uga i se faasalaga.

O le faasalaga la ua taunuu iai le faamasinoga e eseese le umi o tausaga ma masina ua faasala ai i latou.

I le solitulafono o le ave faamalosi o se tagata e aunoa ma se lotomalie o lea tagata.

Lemana Nouata e 2 tausaga ma le 8 masina i le falepuipui.

Vaele Iosia Reopoamo ma Tauti Tiaka e ta’i 2 tausaga ma le 5 masina i le falepuipui.

Ofisa Setefano e 2 tausaga ma le 3 masina i le falepuipui i le ave faamalosi o se tagata ae 2 masina i le falepuipui i le moliaga o le faaoolima.

Vaa Alai e 2 tausaga ma le masina e tasi i le ave faamalosi ae 2 masina i le faaoolima.

Lemana Pene ma Faavevela Lale poo Tuua Lale e tasi le tausaga ma masina e 9 i le solitulafono o le ave faamalosi o se tagata ae 2 masina i le falepuipui i le faaoolima.

Amiga Lagaaia e tasi le tausaga ma masina e 9 i le falepuipui i le solitulafono o le ave faamalosi o se tagata.

Tomasi Samuelu e 16 masina i le falepuipui i le solitulafono lava lea ma Salapo Uii ma Toemago Lasalo e ta’i fitu masina i le falepuipui.

O faasalaga ua iai ma masina faaopoopo i le moliaga o le faaoolima o le a tuli faatasi ma e manino mai i le faasalaga a le faamasinoga o le a eseese taimi e mae’a ai ma magalo i latou.

O Setema o le tausaga e 2023 i Lefagaoalii na tula’i mai ai le solitulafono ua molia ma faamaonia faasaga ia i latou ia e to’asefulutasi, lea na saisai ai lima ma vae o se matai ona tui ai lea o le amo ae sa’esa’e i le aai, e mafua ona o se faai’uga a alii ma faipule.

O se faai’uga e pei ona faailoa i faamaumauga a leoleo, na mafua ona o se gaioiga a le matai na faia iai le gaioiga ona o ni tala malolosi na ia lafo i matai o le nuu, ma le Fesoasoani o le Tiakono o le Ekalesia Katoliko i Lefagaoalii.

O le aotelega o le faai’uga a le faamasinoga, e leai se isi e i luga a’e o le tulafono, ma o pulega a alii ma faipule e tatau ona latou faaaloalo ma usita’i i le tulafono.

Sa taumafai atu nisi o i latou ua faasalaina e tootutuli ma faia se faatoesega i le faamasino na feagai ma lenei mataupu peitai sa lē talia, ma o le saunoaga foi a le faamasino o le faai’uga ua taunuu iai, e lē mafai ona toe suia.

E 75 tausaga le tagata pito matua o i latou ua nofosala, sosoo ane ai le 68 tausaga, 60, 55, 31, 26 ma le 20 tausaga le matua.