Ua iai nei se faatonuga ua tuuina mai e le Faamasinoga Faaitumalo, ua tapu pe faasā ai le ta’ita’i o le vaega e puipuia aiā tatau a tagata, susuga Tuilaepa L Sailele Malielegaoi, ona toe faia ni ana faasalalauga e afea ai i sona finagalo le Minisita o A’oga ma Aganuu le afioga Aiono Alec Ekeroma, ma le Palemia susuga Laaulialemalietoa Leuatea Polataivao Fosi, a o tālia ai sana tali e tuuina atu i moliaga a leoleo e le’i mae’a ona tapena ma faamautū.
O le Aso Lua na toe fofogaina ai lea matāupu tau faamasinoga e pei ona faaulu ai le tagi a le Minisita o A’oga ma Aganuu i le faia e Tuilaepa o ni tuua’iga i luga o fesoota’iga faatekonolosi ua aafia ai le tulaga ta’uleleia o le Minisita.
O le isi foi tagi ua faaulu i leoleo e le Palemia ma le ta’ita’i o le vaega faaupufai o le Faatuatua i le Atua Samoa ua Tasi, ua tuua’ia ai le ta’ita’i o le vaega faaupufai o loo agaia le malo i lona faasalalau i auala faatekonolosi o ni faamatalaga sesē ma lē sa’o ua faaleagaina ai le tulaga ta’uleleia o lē ua tagi.
Ua talia e le faamasinoga le talosaga a le itu a leoleo e tuu atu se 4 vaiaso e tolopō ai le matāupu se’i faamautū moliaga uma e le loia mai fafo o le a finauina moliaga a leoleo.
O le tau amataga o le masina fou o Me o le a toe valaau ai moliaga o le ta’ita’i o le vaega e puipuia aiā tatau a tagata ma o loo tatala o ia i tua e aunoa ma ni tuutuuga ona o le tulaga talitonuina e leoleo o le usita’ia e lē ua molia o le tulaga auai i taualumaga uma o lona faamasinoga.
Sa auai le susuga Tuilaepa Lupesoliai Sailele Malielegaoi i le valaauga o ona moliaga i le Aso Lua o lenei vaiaso lea na toe a’e uma ai galuega i le tuana’i o aso mālōlō o le Eseta.
O loo molia o ia i aiaiga o le tulafono o soligatulafono e faasino i le faia o tala taufaaleaga, o se aiaiga faaletulafono na aveesea ae na toe faaofi i lea tulafono a o avea Tuilaepa ma Palemia.
Mo le silafia o le taimi na vevela ai tuua’iga a le itulau sa faaigoaina o le Palemia poo OLP i le upega tafa’ilagi o le facebook poo le api o foliga na toe faaaogā ai ia aiaiga faaletulafono e faaulu ai ni tagi i leoleo.
