O le nofoaga o iai nisi o pisinisi e pei o ni supamaketi i le afio’aga o Laulii i le itumalo o le Vaimauga, o le a avea se vaega o fanua o umia sa’oloto o loo tu lalata iai ma ua faatau e le Ekalesia a Iesu Keriso o le Au Paia o Aso e Gata ai, e fausia ai le nofoaga tutotonu poo se siteki a lea ekalesia.
O le siteki lea a Nuumau Upolu Stake o loo aofia ai iunite poo falesa e iva o lea ekalesia e aofia ai aulotu i Fusi, Vailoa, Eva, Solosolo, Laulii, Letogo ma Luatuanuu.
E tusa ma le 4 eka le tele o le fanua ua faatau e le ekalesia aoao i le tau e tasi tesimale 3 miliona tālā mo le fausia o le nofoaga tutotonu lea ua fuafua e amata i le masina nei ona galuega.
Se faatalanoaga ma le afioga Maposua Tuaimalo Salapo Siaosi o ia o le sui o le va i fafo o le siteki a Nuumau Upolu.
O le sauniga na faapa’ia ai le fanua ma sua ai foi le eleele e faailoga ai le amatalia o le galuega, o le a fausia ai le nofoaga tutotonu o le siteki a Nuumau Upolu i le afio’aga o Laulii, sa auai ta’ita’i maualuluga o le ekalesia a Iesu Keriso o le Au Paia o Aso e Gata ai i Samoa faapea sui o aulotu eseese i totonu o lea siteki a le ekalesia.
