Ua faailoa e se tamaitai Colombia, o loo falepuipui i moliaga o lona aumaia o pauta faasāina i totonu o le atunuu, sa faaosoosoina o ia e faia lea gaioiga, a o galue ai i se tasi o faato’aga i totonu o Niu Sila nei.
Ae e ui i faamatalaga a lenei tamaitai, e lē o avea lea ma tulaga e ‘alofia ai le moliaga ma le faasalaga i le tulafono.
O lē ua molia o le tamaitai o Ruth Yanid Ramirez-Alfonso, e aofia i le to’avalu o tagata na saisai ma taofia e leoleo i le tausaga 2021, i se tasi o mataupu aupito i telē ma mata’utia i Niu Sila i pauta faasāina na faia iai se osofa’iga a leoleo.
I le tula’i ai o lea Ruth i le faamasinoga, na ia tuuina atu ai lana tali tetee i lona auai i faufauga i le aumaia o nakoti peitai i le faasolo ai o taualumaga o lea mataupu na ia ioeina ai le moliaga o lona aumaia o le pauta faasāina o le cocaine.
I taualumaga o lenei mataupu e le’i manuia taumafaiga a Ruth, ina ia molia e aunoa ma le nofosala i le to’ese, auā na falepuipui lenei tamaitai i le tausaga na se’i mavae atu nei.
Na apili e le tamaitai le faai’uga a le Faamasinoga Maualuga.
Ina ua lē manuia foi ana taumafaiga i le faamasinoga o apili o lea na toe taumafai atu i le Faamasinoga Maualuga, ae e lē o maluelue lava le faamasinoga i le finauga a le tamaitai Colombia.
Ma o loo tumau pea moliaga ma le faai’uga i le nofosala ai i le falepuipui, ma o loo faailoa le telē o le avanoa e ono toe tipoti ai i lona atunuu.
O Ruth Yanid Ramirez-Alfonso, na aofia i le to’avalu o loo masalomia ma tuua’ia i lo latou aumaia o le oo atu i le 50 kilokalama le mamafa o cocaine, mai Colombia i totonu o Niu Sila.
Ua faamauina e oo atu i le miliona le tau faaataata pe a faatau i le maketi.
Puna o Faamatalaga:https://www.newstalkzb.co.nz/news/crime/supreme-court-turns-down-colombian-farm-worker-s-bid-to-seek-discharge-over-cocaine-conviction/
