Faaopoopo taimi galue o le Ao o le Malo, tālia se faai’uga a le FAST

O le isi tauaofiaga o sosoo ai nei a le Palemene e tatau ona tuuina atu ai i le Fofoga Fetalai se finagalo o le vaega faaupufai o le Faatuatua i le Atua Samoa ua Tasi, i le filifiliga o se Ao o le Malo.

Ua faaalia e le tamaitai Palemia le afioga Fiame Naomi Mataafa i se feiloa’iga puupuu i le faletalimalo o le Taumeasina i le Aso Lua, sa folasia i le laulau a fono a le kapeneta i le Aso Gafua le mataupu peitai ua faamoemoe e tuuina atu i luma o le fono a sui faipule o le faafaletui i se taimi.

O le aso 22 o Iulai na mae’a ai le lima tausaga o le nofoaiga a le afioga Tuimalealiifano Vaaleto’a Sualauvi II i le tofiga Ao o le Malo, ma ua faailoa mai e le ta’ita’i o le Malo o le faiga masani o le faaopoopo o le taimi e tauaveina ai le tofiga a o tālia se finagalo o le vaega faaupufai ua avea nei ma faigamalo o latou e faia le filifiliga ma tuuina atu i le Fofoga Fetalai, ona mulia’i lea faasilasila i le Palemene.

O teuteuga o le Faavae mai le faigamalo talu ai na faaofi ai lea suiga i le filifiliga o se Ao o le Malo, faatasi ai ma le teuteuga o le faavae ua pasia, lea a mae’a le lima tausaga muamua a lē o loo tauaveina le tofiga ae toe filifilia mo le isi lima tausaga, ona muta ai lea pe a mae’a i le aofa’iga e sefulu tausaga poo le lua nofoaiga ta’i lima tausaga. O le tofiga o le Ao o le Malo o se tasi o ta’iala ma faiga faavae sa folafola e le Faatuatua i le Atua Samoa ua Tasi a tulai i le pulegamalo o le a toe silasila iai.